Викторин митрополитлэн Иисус Христослэн Вордсконэзлы сӥзем ӟечкылан гожтэтэз
Ижкар-Удмурт Епархиен кивалтӥсь Архиерейлэн Викторин Митрополитлэн Удмурт Митрополиысь священникъёслы, монахъёслы, мирысь калыклы Кузё-Инмарлэн Иисус Христослэн Вордсконэзлы сӥзем ӟечкылан гожтэтэз
«Христос вордске – данъялэ,
Христос Инмысь ваське – пумиталэ!».
Кузё-Инмарен яратэм гажано пастырьёс, епархилэн черкъёсаз ужась-тыршисьёс, Инмарез мур яратӥсь монахъёс, мирын улӥсьёс, яратоно атайёс, агай-вынъёс, сузэръёс!
Вань сюлмысьтым быдӟым шумпотон вуэмен ӟечкыласько. Быдӟым Праздник нунал вуиз: сузёнтэм Инмар сьӧлыко дуннее адями луыса лыктӥз, со – Кузё-Инмармылэн, Утисьмылэн Иисус Христослэн Вордскон нуналыз.
Кык сюрс арлэсь тросгес дыр ортчиз ини, куке уйлэсь пеймыт вакытсэ кизили лыктыса югдытӥз но Инмар Пилэсь адями луыса вордсконзэ быдэс дуннелы ивортӥз. Номырлы ёрмисьтэм-ӟудӥсьтэм быдӟым Инмар Аслаз кылдытэм муртъёсызлы луыса музъем вылэ ваське, адями кадь лулмугро луэ, ляльчи-раб кадь кариське. Малы нош ляльчи-раб кариське? Инмарлэн кылдытэм дуннеяз адями котькинлэсь вылӥ каремын вал, нош Инмарлэсь курон-косонзэ сӧрем понназ со райысь поттэмын вал; кема дыр со Атаезлэн Инмысь Эксэйлыказ сюронлы оскыса улӥз.
Туж паймымон амалэн Кузё-Инмармы сьӧлыкъёс пӧлы бырись дунне вылэ, курадӟись, йыромем нылпиосыз доры быдӟым яратонэн утиськон сюрес вылэ мед султозы шуыса ӧтьыны лыктэ. Адями луыса лыктэ сьӧлыкъёс пӧлы бырисез мозмытыны, бурмытыны. Кык сюрс арлэсь тросгес дыр ортчиз ини Вифлеемысь пудо возьман пещераын Вордскемлэн адямиосты утьыны кутсконэз дырысен. Соку кадь ик, али но Ин но музъем, Инмысез но музъем вылысез но Черк огазеясько быдӟым, паймымон Вордсконэз данъяны: «Дан вылысь Инмарлы, музъем вылын каньыллык, адямиослы ӟеч эрик».
Та дун-чылкытэсь нуналъёсы шумпотыса данъяломе Инмарез асьмеос, сьӧлыко муртъёс вылэ, гажан-жалянзэ дурыныз сётэм понна. Вань эксэйёс пӧлысь Эксэйлэсь зӥбыт-востэм луонлы дышетскоме, Со Ассэ зӥбыт-востэм карыса пеймыт пещераын вордскиз, турын тырон пӧлын кыллиз. Улон киросмес Инмар вылэ оскиськыса ӟургетытэк нуоме. Христсослэн яратонэныз югдытскоме, Со асьмелы лулмес-сюлэммес выльдонлы сисьмисьтэм-бырисьтэм оскон сётэ.
Шумпотонмес ватыса ум улэ, пудо возьмасьёслы возьматскем кылчинъёс кадь шумпотонмес калыклы но ивортоме. Кузё-Инмарлэсь курон-косонъёссэ быдэсъяса уломе но Солэсь Вордсконзэ ӟеч ужъёсын пумиталоме: ёрмыса-ӟудыса улӥсьёслы юрттӥськоме, висисьёс доры мыноме, ӝоже усемъёсты буйгатоме, вож потоно муртъёсынымы огкыл шедьтоме… Та паймымон ужез сюлмамы, луламы возёме, тодамы ваёмы музъем вылын но Инмар асьмемын огазьын улэ шуыса. Соин ӵош пумтэм вапумъёс ӵоже Инмын но озьы ик шумпотыса мед уломы шуыса. Инмар асьмемын!
Кузё-Инмарен яратэм атайёс, агай-вынъёс, сузэръёс! Капчи, шуныт мылкыдын тӥледыз ӟечкыласько быдӟым шумпотон праздникен: Христослэн Вордсконэныз но вуэм выленыз 2017-тӥ арен. Вӧсяськыса тӥледлы ӟеч тазалык, улонады азинлык, вань ужъёсады Инмар дорысь юрттэт курисько.
Вифлеемын Христос Инмар Нунылэн Вордсконэзлы шумпотыса, тӥледыз яратыса бакель карисько
Ижкар-Удмурт Епархилэн кивалтӥсь Архиереез
+ Викторин
Митрополит.
Христослэн Вордсконэз
2016/2017 ар
Ижкар
