Викторин митрополитлэн Иисус Христослэн Вордсконэзлы сӥзем ӟечкылан гожтэтэз
ИНМАР ПИЛЭН ВОРДӤСЬКОНЭЗЛЫ СӤЗЬЫСА,
УДМУРТ МИТРОПОЛИЯЫСЬ ИЖКАР-УДМУРТ ЕПАРХИЫСЬ ВИКТОРИН МИТРОПОЛИТЛЭН
СВЯЩЕННИКЪЁСЛЫ, МОНАХЪЁСЛЫ,
МИРЫН УЛӤСЬЁСЛЫ ЫСТЭМ
ӟЕЧКЫЛАН ГОЖТЭТЭЗ
«Пещераын вордӥськемын, турын тыронын кыллемын
милям утиськонмы понна, Христос – асьмелэн зэм Инмармы»
Черк службаысь бакель карон
Лулыным-сюлмыным туж шумпотыса тӥледыз ӟечкыласько Христослэн Вордӥськонэныз но вуэм Выль Арен – 2018-тӥ арен! Инмарлэсь сётэм котькуд арзэ визь (кӧс утён) пыр ортчиськомы но черке лыктыса причастие басьтӥськомы, Инмарлэсь асьмеды утёнын быдӟым паймымон ужзэ адӟиськомы.
Музъем вылын адями луиз Ачиз Быдӟым Инмар, та пумысен Кронштадтысь шонер улыса святой луэм Иоанн шуэ: «Асьме доры лыктӥз Со, Кин одӥг кыл вераз но ӧвӧлэз вань кариз, ӧтьыса вайиз вань адскись но адскисьтэм макеосты, Кин кыл вераз но тылобурдоосты, чорыгъёсты, ньыль пыдын ветлӥсьёсты, нымы-кибыосты, вань макеосты кылдытӥз, кудъёсыз уло Солэн ӟеч эрикезъя быдӟым кужмо киулаз; лыктӥз Со, Кинлы дугдытэк кышкаса но шумпотыса ужало-тыршо лыдъянтэм трос Ин ожгарчиос – Кылчинъёс».
Дуннеез Кылдытӥсь, вань улэп макеослы улон Сётӥсь васькиз курадӟыса улӥсь Аслаз кылдытэмъёсыз доры соосты выльысен Инмысь Атыкай юртаз берыктон вылысь, кудӥзлэсь соос куштӥськизы сьӧлыкъёс пӧлы выеменызы сэрен. Котьмар ласянь адӟем карон, идеал луыса ушъяно-данъяно Кузё-Инмар зэмос адями луыса музъем вылэ васькиз адямиос вылысь сьӧлыкъёслэсь яраоссэс – висёнъёссэс бурмытон понна.
Тазьы кутске адями выжыез утёнын Инмарлэн сюресэз, со эксэй юртысен, узыр, зарни четлыкысен уг кутскы, со кутске куанер турын тырон гидысен, шыпыт, пеймыт пещераысен. Та пыр асьмеос валаны кулэ: лыктӥз Со, Кин та дуннеысь быръем эксэйёслы гинэ зэмос сюрес возьматыны ӧз лыкты, Со лыктӥз вань адямиос доры, кинъёс лулынызы, сюлмынызы кабыл басьто Солэсь утиськыны ӧтись куаразэ. Лыктӥз туж кема возьмам Мессия, Кин быгатыса сётэ ноку но бырись-тэм узырлыкез. Со узырлык эксэй кивалтэтъёсын, музъем вылын кузёяськисьёс киын, сьӧлыко дуннелэн сисьмись-бырись шыкысъёсаз уг возиськы, уго Ачиз Инмар Пи шуэ: «Мынам Эксэйлыке та дуннелэсь ӧвӧл» (Иоанн 18: 36), со узырлык возиське сисьмисьтэм-бырисьтэм шыкысын, кудӥз потэ Инмарен огазе кариськон бордысь, зэмос яратон но оскон бордысь, Христос Инмар доры нуись сюрес вылысь, кудӥз нуэ Инмысь Атаймылэн юртаз – рае.
Та югыт-чылкыт, утиськон ваись праздник нуналъёсы тӥляд сюлэмъёсты, лулъёсты тол нуналъёс кадь кезьыт куен медаз улэ. Пеймыт, кезьыт уй медаз быгаты тӥляд сюлмысьтыды оскондылэсь, яратондылэсь тылзэ ньылыны-кысыны, но мед луоз озьы: кызьы Вифлеем кизили пеймыт уе кизили тодмасьёсты кема возьмам Утисьмылы йыбырттыны нуиз, озьы ик асьмеды но Христослэн Вордӥськон праздникезлэн югытэз утиськонэ нуись сюресмес мед югдытоз, мед нуоз Христос Инмар доры ваньмы асьмеос ноку но бырисьтэм улон басьтыны мед быгатомы шуыса. Мылкыд карисько: та быдӟым праздник нуналэз тодамы возьыса, мед быгатомы ог-огмылы юрттӥськыса улыны, таӵе ӟеч ужъёсмы пыр вань адямиос Христослэн Вордӥськон нуналаз лулзылы, сюлэмзылы шумпотон басьтыны мед быгатозы.
Туннэ югдыса-пиштыса улӥсь быдӟым праздник уе сюлмысьтым мылкыд карисько, сӥзисько тӥледлы, тӥляд семьяостылы каньыллыко, дэлето-берекето улон, сӥям мылкыдын медам улэ. Та паймымон быдӟым праздник нуналэ Инмар Пилэсь Христослэсь асьмеды утён понна адями луонзэ туж шумпотыса, сӥлы-данлы карыса уломе.
ВИКТОРИН
ИЖКАР-УДМУРТ ЕПАРХИЫСЬ МИТРОПОЛИТ,
УДМУРТ МИТРОПОЛИЯЛЭН КИВАЛТӤСЕЗ
Христослэн Вордӥськонэз
2017/2018 ар
Ижкар
