Викторин митрополитлэн Пасхаен ӟечкылан гожтэтэз
Ижкар-Удмурт Митрополиялэн кивалтӥсь Викторин митрополитлэн
черкын служить карисьёслы, монахъёслы, мирын улӥсьёслы
Пасхаен ӟечкылан гожтэтэз
Кирос вылын курадӟонэз, кулонэз чидад но, ваньмызлэсь кужмо
Кузё-Инмаре, кулэмысь улӟыса султӥд,
данъяськомы Тынэсьтыд Улӟыса Султондэ
Югыт пуксёнэ чирдон стихира
Ортчизы визян, кӧс утён нуналъёс, солы лулмес но мугормес кыдатыса дасяськимы, уго тазьы Святой Черк-Анай луллыко подвигъёс дыр сётэ, тазьы улыса быдӟым ужрадэ – дунневыл калыклэн тужгес быдӟым праздниказ пыриськыны мед быгатомы шуыса, улонлэн кулонэз вормон праздниказ пыриськыны дася. Нош али, христиан осконлэсь быдӟымлыксэ тодытон нуналэ, куке адями выжылы утиськон сярысь ивор вераське, тӥледыз ваньдэс ӟечкыласько бырисьтэм улон ваёнлэн, христиан осконлэсь зэмлыко луонзэ возьматӥсь кылъёсын:
Христос Улӟыса Султӥз! – Зэм ик Улӟыса Султӥз!
Та югыт Пасха нуналэ огазе кариськыса ушъяломе-данъяломе адями лулъёсты утись Инмарез, Иоанн Златоуст музэн сӥё-дано кароме Утисьмес: «Тани асьме понна кема возьмам утиськон ваись Кузё-Инмармылэн Иисус Христослэн улӟыса султонэзлы сӥзем праздник вуиз. Со тупаса улон, тушмонъёсты быдтон, кулонэз вормон, диаволлы бырон вае. Туннэ адямиос Кылчинъёсын, лулмугортэм Кужымъёсын огазеяськизы но Инмарлы ушъян гуръёс кырӟало. Туннэ Кузё-Инмар адлэсь капказэ куашкатӥз, кулонлэсь тусбуйзэ ик быдтӥз. Но мар мон шуисько: “Кулонлэсь ымнырзэ?” — кулонлэсь нимзэ ик Со воштӥз: табере со “кулон” шуыса уг ни нимаськы, табере сое “буйгатскон, кӧлон” шуо».
Дыр вуиз азьпал улонлэн вуонэз сярысь веранлэн быдэсмонэзлы, куке утиськонлэн ватӥськыса улонэз шарае потӥз, куке сьӧлыклэн нӧд пӧлаз выйись адямиослы, Адамлэн райын лэсьтэм сьӧлыкез пыр дунне вылэ пеймытлык, кышкаса улон вуиз, Ачиз Инмар Аслаз кылдытэм, бырись лулъёсызлы утён вылысь кизэ мычиз, Кирос вылын Ассэ курбонлы сётыса, кулонлэсь сьӧлтэтъёссэ, адлэсь капказэ куашкатӥз, нош адями выжылы Инмысь Атайлэн Юртаз пумтэм вапумъёс ӵоже шумпотыса-куаныса улонлэсь ӧссэ усьтӥз.
Кузё-Инмарлэн Пасхаез пыр ваньзэ кылдытӥсь Быдӟым Инмар асьмелы бырисьтэм ӟечлыкъёс, гажан-яратон сӥзе, но та сӥзёнэз басьтыны быгатэ утиськон ваись секыт сюрес кузя мынӥсь адями гинэ, кин улон-вылон кироссэ басьтэ но мур осконэн сое нуэ ке, христиан адями луонлэсь вылӥ данлыксэ саптатэк улэ ке, кин визь сынаськонлы, кулэтэм мылкыд ӝуатӥськонъёслы уг сётӥськы, кин мылкыдзэ Инмысь Атаймылэн Юртэз пала ӝутэ, Утисьмылы вазиське, сюлэмаз осконэн, оскиськонэн, яратонэн улэ, Христослэсь Улӟыса Султонзэ тодаз возе.
«Адам пыр ваньмыз кулылӥзы, нош Христос пыр ваньмыз улӟыса султозы» (1 Кор. 15: 32).
Христос Инмарлэн Улӟыса Султонэзлы лулыным-сюлмыным шумпотыса ваньдылы ӟеч тазалык, шудбуро, дэлето улон, семья куспады тупаса улон сӥзисько, вань ужъёсады Инмар тӥледлы мед юрттоз шуыса вӧсяськисько. Быдэс дунне выллэсь улонзэ воштӥсь, выльдӥсь Святой Пасха котьку но тӥлесьтыд сюлэмъёстэс мед шунтоз, быдӟым, чылкыт осконлэсь, оскиськонлэсь, яратонлэсь, асьмелэн утиськонмылэсь тылзэ мед ӝуатоз. Кузё-Инмармы бордын улыса зэмос шудбур басьтыны мед быгатомы.
Христос Улӟыса Султӥз! – Зэм ик Улӟыса Султӥз!
Викторин
Ижкар-Удмурт Митрополиялэн кивалтӥсь митрополитэз.
