Викторин митрополитлэн Христослэн Вордӥськонэзлы сӥзьыса Ӟечкылан Гожтэтэз
Инмар Пилэн Вордӥськонэзлы сӥзьыса,
Удмурт Митрополиаысь Ижкар-Удмурт Епархиысь
ВИКТОРИН митрополитлэн
священникъёслы, монахъёслы, мирын улӥсьёслы ыстэм
Ӟечкылан Гожтэтэз
Кылчинъёс Инмын шумпото-шулдыръясько, туннэ вань калык шумпотэ,
Вифлеемын вордӥськем Утисьмы Кузё-Инмар понна вань улэп макеос шудо-шулдыръясько
Христослэн Вордскон праздникезлы сӥзем Быдӟым Ӝыт службаысь кылбур
Лулы, сюлмы шумпотыса ӟечкыласько ваньдэс Христослэн Вордскон югыт-чылкыт праздникеныз но вуэм Выль 2019-тй Арен!
Нош ик лулмугормес ӧжытак ӝикатыса, визяса (кӧс утьыса) лулмес чылкытатӥмы но Инмарлэсь паймымон адями луонзэ адӟисьёс луонэ пыриськыны быгатӥськомы.
Ӟуч югдытӥсьёс пӧлысь Ростовысь святой Димитрий сӥлы-данлы каре таӵе кылъёс вераса: «Инмысь Эксэй музъем вылысь тылысэ-пещерае пыриз но Соин ӵош отчы пыризы Солэн вань ожгарчиосыз, Солэн Инмысь вань ужась-тыршисьёсыз; Соин ӵош пыриз Ин аслаз быдӟымлыкеныз. Та часэ Ачиз Инмысь Инмар Вифлеемысь тылысэ-пещерае пыриз».
Утиськон сярысь азьвыл ик веран-тодон быдэсмиз, сьӧлыкъёсын гижлоӟем, калсырам адямиос доры Инмысь ӟеч эрик васькиз: Вылысь Инмар Аслаз кылдытэм адямиез кадь ик луэ, со дыре ик, Инмар луонэзлэсь но уг усьы: сьӧлыкъёс пӧлы выем нылпизэ Инмысь Эксэйлыке вуттонлы дася. «Кузё-Инмар асьмеос кадь мугор басьтыса, ляльчи (раб) кариськиз — ляльчиосты эрико карон понна: Со инбамез
някыртӥз но васькиз (Пс. 17:10), музъем вылын улӥсьёсты Инме ӝутон понна»,- Христослэн вордсконэз пумысен шуэ Иоанн Златоуст.
Инмар — со Яратон, со яратон ик асьмемыз, адямиосты, улон сётйсь яратонэн улыны дышетэ. Инмар луыса вылысь, Со Инмысь пудо возён куанер пещерае васькиз, адямиос кадь мугоро луиз но Ӟеч Ивор тодытон пыр, кирос вылын курадӟон пыр, кулонэз вормыса улӟыса султӥз. Кузё- Инмармы Иисус Христос таӵе примеръёс-адӟонъёс пыр асьмемыз яратӥсь луонлы дышетэ. Тае христиан калыклэн яратонэз шуо, тае асьмелы Утисьмы усьтӥз музъем вылын улон дыръяз. Со асьмелы выльзэ, тужгес дунозэ, таӵезэ курон-косонэз сётӥз: яратэ огдэс огды. Но, жаляса верано луэ, та курон-косонэз ӵем дыръя вунэтӥськомы, асьмеды яратонэз гинэ утчаськомы.
Инмар Пилэн вордскон дун-чылкыт пиштӥсь уяз вань адямиос понна утиськонлэн югытэз ворекъяны кутскиз. Со понна мон тӥледлы, тӥляд семьяостылы тупаса улон, ӟеч улон-вылон сӥзисько. Ӟеч ужъёсынымы, христиан осконлэн курон-косонъёсыныз улыса, ваелэ шумпотон ваёме ӵыжы-выжыосмылы, семьяосмылы, матысь тодмоосмылы, тодмотэм муртъёслы но, уката ик кинъёслы кулэ асьмелэн юрттэтмы, сюлэмзэс буйгатӥсь кылъёсмы. Та дун-чылкытэсь святой нуналъёсы Инмар Пилэн адями луонэзлы, Солэн асьмелы ваем яратонэзлы шумпотыса ваелэ ӟеч ужъёс лэсьтыса уломе.
Вифлеемысь тылысын-пещераын Утисьмылэн Иисус Христос Кузё- Инмармылэн вордсконэзлы сӥзьыса кылчинъёслэн шумпотыса кырӟан гуренызы асьмелэн лулъёсмы огаземед кариськозы!
ВИКТОРИН,
ИЖКАР-УДМУРТ ЕПАРХИЫСЬ МИТРОПОЛИТ,
УДМУРТ МИТРОПОЛИЯЛЭН КИВАЛТӤСЬ ЙЫРЫЗ
Ижкар
2018/ 2019 ар
