Викторин митрополитлэн Пасхаен ӟечкылан гожтэтэз
Удмурт Митрополияысь священникъёслы, монахъёслы, мирын улӥсь калыклы Ижкар-Удмурт епархиаысь Викторин митрополитлэн Пасхаен ӟечкылан гожтэтэз
«Христос кулэмысь улӟыса султӥз но кулонлэсь
жильыетсэ сузмытӥз: музъемлы ӟеч ивор но туж
бадӟым шумпотон вераз, Инъёс, Инмарез данъяса кырӟалэ».
Стихира 7-тӥ глас
Ваньзэ чылкытатыса, гылтыса нуись бызись вуос кадь ӝог ортчизы утиськон ваись святой Быдӟым Визьлэн нуналъёсыз. Та Быдӟым Визь асьмелы луонлык сётэ сьӧлыкъёсын саптаськем лулмес сузяны-чылкытатыны, причастие пыр Инмарлэсь улэп улон сётӥсь дэлетсэ басьтыны, кудӥз асьмеды нуэ бырисьтэм улон басьтӥсьёс пӧлы, соослэн шумпотыса-шулдыръяськыса улон пӧлазы. Кузё-Инмармылэн Иисус Христослэн Улӟыса Султонэз вормон вае, ваньзэ югдытэ, дун-чылкыт каре, кышкыт адлэсь капказэ куашкатыса, кулонэз погыртэ.
Та святойлэсь но святой, югыт пиштӥсь нунал зэм ик, асьмелэн осконмылэсь шонерлыко луэмзэ возьматэ, кудӥз асьмеды райлэсь бырисьтэм ӟечлыксэ басьтӥсь каре. Таӵе адӟонлы шумпотыса, бадӟым яратонэн тӥледыз ӟечкыласа шуисько:
Христос улӟыса султӥз! Зэм ик, улӟыса султӥз!
Ваелэ асьмеос но лулмес Утись-Мозмытӥсь Христос Инмармылы сюлмысьтымы потэм кылъёсын тау карыса вӧсяськоме. Григорий Богослов святителен ӵош огмылкыдо кариськоме, ас дыраз со тазьы шуиз уго: «Та Быдӟым нуналэ Христос кулэмъёс пӧлысь поттэмын вал. Та нуналэ Со кулонлэсь шизэ чигтӥз, адлэсь кӧшкемыт пытсэтсэ куашкатӥз но отчы сюрем лулъёслы эрик сётӥз. Та нуналэ шайгуысь султыса Со адямиослы возьматскиз, кинъёс понна Со вордӥськиз, кулӥз но улӟыса султытэмын вал, Со кадь ик асьмеос но мед султомы шуыса. Та югыт-чылкыт нуналэ кылчинъёс шумпотыса, данъяса вормон гурен кырӟазы».
Адамен Ева вашкала анай-атайёсмы пыр быдэс дунневыл сьӧлыклэн жильыетаз сюриз, кышкан-куалекъян но кулонлэсь курдан сое ёртӥзы. Нош ваньмызлэсь ӟечлыко, гажась-жалясь Кылдытӥсьмы сьӧлыкъёсын саптаськем Аслэсьтыз кылдытэм муртъёссэ ас понназ ӧз кельты, Со Адями Пи Христос луыса соос доры лыктӥз, туж секытэсь курадӟонъёс пыр потӥз, кирос вылын курадӟонэз чидаз, сьӧлыклэсь, кулонлэсь кужымзэ быдтӥз, кулэмысь улӟыса султӥз но Выль Адам луиз, Инмар Черкез кылдытӥсь луиз. Та паймымон ужъёс возьмато курбонлы сётэм яратонлэсь, мур осконлэсь кужымзэс, кудъёсыз асьмелы утиськон сёто, кулэмысь улӟыса султонлы но бырисьтэм улонэз басьтонлы оскиськон сёто.
Удмурт Митрополиялэн кивалтӥсез луыса, мон тӥледыз, Черклэсь оскиськымон муртъёссэ, Быдӟым Визь дыръя басьтэм ӟечлыкъёстэс утьыны курисько. Ческыт зын поттӥсь миро кадь, соосты Гроб доры ваёме, кытын Христослэн-Вормисьлэн утиськон вайись югытэз пиштыны кутскиз, со луэ Улӟыса Султӥсьлы, Мозмытӥсьлы ваем мед-кузьым но тау каронмы.
Вӧсяськыса курисько ваньдылы, тӥляд семьяостылы ӟеч тазалык, азинлык, тупаса улон нуналъёс. Пасха праздниклэн шумпотонэз, сюлэмъёсмес, лулъёсмес мед юнматоз, улонлэсь кироссэ нуыны,осконмылы, оскиськонмылы кужым мед сётоз, улонмылэн ӟоскыт, секыт сюрестӥз христиан адямиос кадь ортчыны мед быгатомы но Инмысь Атаймылэн Эксэйлыказ пырыны мед быгатомы.
ВИКТОРИН
Ижкар-Удмурт епархиысь митрополит,
Удмурт Митрополиялэн кивалтӥсез
Ижкар
Христослэн Пасхаез
2019 ар
