Викторин митрополитлэн Христослэн Вордсконэзлы сӥзем ӟечкылан гожтэтэз
Удмурт митрополияысь Ижкар-Удмурт епархиялэн кивалтӥсь архиереезлэн ВИКТОРИН митрополитлэн черкын служба нуисьёсты, монаъёсты, мирын улӥсьёсты Христослэн Вордсконэзлы сӥзем ӟечкылан гожтэтэз
Асьмеды утёнлэн дырыз матэ вуэмъя, гурезьысь пещераын
нуны вайыны Нылмурт лыктэ,
Иуда музъемысь Вифлеем, шумпоты, шулдыръяськы,
уго тон дорысь дуннеез югдытӥсь Кузё-Инмармы потэ.
Христослэн Вордсконэз азьысь праздниклэн стихираез, 2-тӥ глас
Лулысь-сюлмысь потэм бадӟым шумпотонэн ӟечкыласько тӥледыз улон ваись быдӟым праздникен – Христослэн Инмар Пилэн Вордсконэныз но вуэм Выль 2020-тӥ арен!
Шундыӝужанысь потэм кизили тодмась пересь визьнодчиос тыршыса мынӥзы азьвыл ик тодытыса верам кизили бӧрсьы Дунне Утисез пумитаны, секыт, шурдыт сюресъёс кузя, инкуазьлэсь бугыръяськонъёссэ чидаса соос мынӥзы пророкъёслэн азьвыл ик верам Инмар Пилэсь Дуннелэсь Кузёзэ, Солэсь Вордӥськонзэ адӟыны. Инмарлэн курон-косонъёсызъя улӥсь та визьнодчиослэсь адӟем карыса, асьмеос но визянлэсь (кӧс утёнлэсь) секытлыкъёссэ чидаса, лулмылэсь, мугормылэсь кулэ каронъёссэ вормыса, тыршимы мынэм потон интыямы – Христос Инмар Пилэн Вордӥськемезлы сӥзем празднике ӟечкын вуттӥськыны, уго Со туннэ асьме понна Давидлэн городаз вордӥськиз.
ХРИСТОС ВОРДӤСЬКИЗ! ДАНЪЯЛОМЕ СОЕ!
Вылӥсь Инмарлэн паймымон вордсконэз но адями луонэз кадь ужъюгдур та дырозь дунне вылын ӧй на вал: Ачиз Ӟечлыколэсь но Ӟечлыко Инмар ваське сьӧлыкъёс пӧлы выем адямиослэн улон интыязы. Улон Сётӥсь Инмар туннэ кылле Вифлеемысь куанер пещераын – пудо возён интыын. Инмысь Кылчинъёс паймо Быдӟым Кылдытӥсьлэн сьӧлыкъёс пӧлы ёрмем адямиосты яратэмезлы, Солэсь зӥбыт-востэмлыксэ соос кырӟаса данъяло.
Пророкъёс улон вакытысен тодмо луиз кыӵе кужымен, мылкыдын Вылысь Ин престол дорысь ваське Христос-Мессия – Мозмытӥсь. Со ваське Аслэсьтыз кылдытэм лулъёссэ Рае (узьмаке) берыктон вылысь. Туннэ пещераысь турын тырон интыын кыллись Пичи Нуны улон уйлэсь пеймытлыкъёссэ югдытэ, сьӧлыкъёсты пазьге но Пасха уйлэн – выль нуналлэн – ӝоген вуонэз сярысь ивор вуттэ, кудӥз Кирос вылын курадӟон пыр оскись, вӧсяськись адямиослы утиськон ваёз – Кулэмысь Улӟыса Султонэз.
Та югыт ваись Инмар празднике – Христослэн Вордӥськон нуналаз – дугдоме ӝожъяськыса, керетыса, алекъяськыса улэмысь, син азямы пуктоме, валаны тыршоме Инмарлэсь улон сётӥсь адями луонзэ, Вылысь Инмарен одӥг-огъя луонзэ. Святой Феофан Затворник музэн данъяломе, со тазьы дышетэ: «Христос Инмарез данъялэ озьы – лулды но, сюлэмды но шумпотон мед басьтоз; ярантэм ужъёс лэсьтыны мылкыдды медаз ӝутӥськы. Христос Инмарез данъян – со кузесь ушъян кырӟанъёс кылдытъян ӧвӧл, чылкыт сюлмыныды шуиды ке: «Христос вордӥськем понна дан Тыныд Кузё-Инмаре!» Таӵе данъян тырмыт ини. Та луоз сюлэммылэн шыпытэн кырӟан гурез, со Инме тубоз но Инмар доры пыроз».
Архипастырьлэн яратонэныз, сюлмаськеменыз ӟечкыласько Православной черкысь вань вӧсяськись калыкез – Христос Инмарлэн Вордӥськонэныз! Та ӟеч иворез быдэс дунне вылэ вылмытоме, Утисьмес Инмар Пиез асьмелэн ӟеч ужъёсынымы данъяломе; тушмонъяськыса ӝожен улӥсьёсты буйгатоме; ёрмыса улӥсьёслы кимес мычоме; сюлэмзылы буйгатскон, каньыллык утчасьёслы Христослэн Вордсконэзлы шумпотонмес соос доры ваёме. Таӵе ӟечлыко ужъёс пыр Эксэйёслэн, вань адямиослэн Инмарзылэн данлыкез эшшо вылӥе ӝутӥськоз. Та пумысен Дунне Кутӥсь Кузё-Инмар шуэ: «Мон Монэ данъясьёсты данэ потто, нош Монэ сантэмасьёс возьытэ вуттэмын луозы» (Экс. 1-тӥ кн. 2:30).
Кузё-Инмарен яратэм гажано пастырьёс, монахъёс, мирын улӥсьёс – атайёс, агай-вынъёс, сузэр-апайёс! Вуэм Выль арын Инмар тӥледлы ӟеч тазалык, шудбур, ӟеч улон мед сётоз, ӟеч малпанъёстэс быдэстыны мед юрттоз!
Инмар Пилэн Христослэн Вордсконэзлы шумпотон котькуд корка, вань семьяосы мед пыроз, Инмарлэн яратонэз ваньмылэсь сюлэмъёсмес мед шунтоз.
ВИКТОРИН
Ижкар-Удмурт епархиысь митрополит, Удмурт Митрополиялэн кивалтӥсез
Ижкар, Христослэн Вордсконэз, 2020 ар
