Викторин митрополитлэн Пасхаен ӟечкылан гожтэтэз

Ижкар-Удмурт митрополиаысь Викторин митрополитлэн Ижкар-Удмурт епархиаысь священникъёсты, монахъёсты, мирын улӥсьёсты Пасхаен ӟечкылан гожтэтэз

Чылкыт кылын-ымын кылчинъёсын ӵош адямиос, шайгуын куинь нунал улыса Улӟыса Султэмез, дуннеез вырӟытӥсез данъяса кырӟалэ

Антипасхалэн ӝыт службаысьтыз стихира

Дун-чылкытатӥськыса ортчем визь нуналъёс бере, асьмеос Евангелиын ивортэм ужъюгдуре пыриськись адямиос луимы: Кузё-Инмарлэсь святой Иерусалим городэ пыремзэ, Кирос вылын курадӟытыса кулэмзэ, Сое шайгуэ ватэмзы сярысь тодӥмы, кызьы та сярысь азьвыл ик пророкъёс веразы вал.

Нош али шумпотыса вераськомы асьмелэн осконмы зэмлыко луэ шуыса:

Христос Улӟыса Султӥз! Зэм ик Улӟыса Султӥз!

Нош та осконмы зэмзэ ик асьмеды ноку но бырисьтэм Утисьмы дорын шудбуро улон басьтӥсь каре.

Инмар – адямиез Кылдытӥсь – Инмысь Престол дорысьтыз музъем вылэ васькиз но Ассэ курбонлы сётӥз асьмеды, дунне вылысь вань адямиосты сьӧлыкъёслэсь, кулонлэн жильыет улысьтыз мозмытон понна, кудъёссэ соос асьсэ вылэ ошизы райын улонлэсь куштӥськемзы бере. Вылысь Кузё-Инмар эрик сётӥз вал ӟеч ужъёс лэсьтыса улыны. Нош адями ярантэм уж лэсьтэм понназ райысь уллямын вал: адямиен Кылдытӥсь вискы пыдэстэм гу кылдӥз, адями сисьмон-бырон киулэ сюриз.

Шугадӟонэ сюрем дунневыл калыклэсь улон-вылон сюрессэ воштыны одӥг улэп адями но уг быгаты, но, кызьы шуиз Ачиз Утисьмы Христос, «Адямиослы со луонтэм, нош Инмарлы номыр но луонтэмез ӧвӧл» (Мф. 19: 26). Уго ваньмыз Инмарлэн киулаз, Со гинэ улон сётӥсь луэ. Тазьы ачиз Яратон музъем вылэ васькиз, адями луиз. Ассэ курбонлы сётыса, дунне вылысь вань адямиослы Со луонлык сётӥз: лулзэс утьыса, асьсэлэн Кылдытӥсьсы доры берытскон.

Утисьмылэн Кирос бордын курадӟемез бере, шайгуысь куинь нунал улэм бераз, ад пытсэтэз куашкатэм бераз, адями нош ик сьӧлыклэн киулысьтыз мозмытскыны быгатӥз. Туннэ асьмеос шумпотыса данлыкен пумитаськомы шайгуысь улӟыса султэм, кулонэз но адэз вормем Адямиез-Инмарез – Христосэз. Нош Со асьмеды киоссэ вӧлъяса дораз ӧте та вормонэз пумитаны но Со бӧрсьы бырисьтэм улонэз басьтон понна мыныны. «Со ваньзэ адями кадь чидаз, Инмар кадь Улӟыса Султӥз, — лулэз быдтӥсь диаволэз вормыса, Аслэсьтыз кылдытэм лулъёссэ утён понна», — тазьы асьмеды дышетэ преподобной Федор Студит.

Асьмеос Солэн дышетскисьёсыз луиськомы ке, дасям сюрес кузя Инмысь Эксэйлыке мыныны дасяськиськомы ке, ваелэ соку Дышетӥсьмылэсь адӟем карыса улонмес яратонэн пачылмытоме но сое ӵыжы-выжыосмы, тодмоосмы доры нуоме, Пасхалэсь вормон гурзэ ӟеч ужёсмы пыр ёрмыса улӥсьёслы ивортоме. Христослэн Улӟыса Султонэз улонамы духовной тодмет мед луоз: сьӧлыко уй дуннеез мед югдытоз, агай-вынъёсмес, су­зэр-апайёсмес Кузё-Инмарлэн Пасхаяз мед пыриськытоз. Асьме визьмын, лулын огазеяськоме Иоанн Златоуст святительлэн верам кылъёсыныз, со тазьы шуэ: «Асьмелэн Кузё-Инмерлмылэн Иисус Хритстослэн Улӟыса Султон нуналыз – со дуннелэн кылдонэз, тупаса улонлэн кутсконэз, тушмонъяськыса улонлэн дугдонэз, кулонлэн кышканэз, диаволлэн погранэз. Со Ачиз кулонлэсь жильыоссэ тӥяса улӟыса султытӥз. Кузё-Инмармылэн кулонэз асьмелы бырисьтэм улон сётӥз; адэ васькыса солэсь кужымзэ быдтӥз, солэсь кузёяськонзэ тырттэм кельтӥз».

Та югыт, утиськон ваись Празднике вӧсяськыса курисько тӥледлы, тӥляд матысь муртъёстылы Улӟыса Султэм Христос Инмарлэн шайгу дорысьтыз ӟеч тазалык, тупаса, ӟечлыко улон дыръёс; вӧсяськыны, ужаны-тыршыны Инмар тӥледлы мед юрттоз. Инмарлэн яратонэз тӥлесьтыд сюлэмдэс, лулдэс буш, тырттэм медаз кельты, Христос Инмарлы оскондэс мед юнматоз, нуналлы быдэ ӟеч ужъёс лэсьтыны мед дышетоз. Инмарлы но, матысь муртъёстылы но ужаны-тыршыны асьмедыз курбон интые сётэ, та пыр Инмысь Атаймылэн киулаз мыныны сюрес лёге.

ВИКТОРИН

Ижкар-Удмурт епархиысь митрополит, Удмурт Митрополиялэн кивалтӥсез

Ижкар,
Христослэн Пасхаез,
2020 ар.