Викторин митрополитлэн Христослэн Вордсконэныз ӟечкылан гожтэтэз
ВИКТОРИН МИТРОПОЛИТЛЭН
Удмурт митрополияысь
Ижкар-Удмурт епархиысь священникъёсты, монахъёсты, мирын улисьёсты Христослэн Вордсконэныз ӟечкылан гожтэтэз
Та святой уе асьмеос котьку сямен ик Инмарлэсь быдӟым паймымон ужзэ пумитаськомы, черке лыктӥськомы но Иисус Христослэсь – асьме Кузё-Инмармылэсь но Утисьмылэсь – Вордӥськемзэ данъяса кырӟаськомы.
Инмарлэсь адями луэмзэ асьмеос валаны ум быгатэ, малы ке шуоно адями визьлы со валантэм маке луэ. Озьы ке но, сое ми оскыса асъяны-валаны быгатӥськомы. Оскыса гинэ ми валаськомы: Христослэн Вордӥськемез асьмелы Инмарлэсь яратонзэ усьтэ, утиськыны луонлык сётэ но Инмысь Эксэйлыке сюрес дася.
Со сяна нимаз данъяны кулэ на Христос Инмармылэсь паймымон востэмлыксэ, уго со адямилэсь сьӧлыкен сӧсырмытэм, кынартэм лулмугорзэ быдэсак Ас вылаз басьтӥз, сое бурмытон но выльдон понна. Со сярысь тазьы Иоанн Златоуст югдытӥсь шуэ:
«Кузё-Инмар, мугормес Ас вылаз басьтыса, ляльчи кадь кариськиз, ляльчиосты эрике поттон понна. Со инбамез някыртӥз но васькиз (Пс. 17, 10), котькуд улын улӥсез инбаме тубтытон понна».
Туннэ нуналмы асьмелэн пӧртэм сюлэмшугъяськонъёсын но шуг-секытъёсын тырмемын. Дунневыл даллашонъёс, ожгар вачевуонъёс, кулон но секыт висёнъёс тросэз борды вутскизы ни. Ваньмыз та секыт зӥбетэн сюлэмъёсмы вылэ выдэ. Озьы ке но, вунэтоно ӧвӧл: Ачиз Кузё-Инмар Аслаз Ӟеч Иворез пыр та выллем кышкыт вакытъёсты «висёнъёслэн кутсконзы» шуыса нима. Нош котькыӵе висёнлы эмъюм вань. Та висёнъёслы Эмъюм туннэ Вифлеемысь турынтыронын Нуны луыса кӧлэ. Тодамы ваёмы: та дуннее Инмармы-Утисьмы яратонэн лыктӥз но соин ик ад пыдэсэз вормыны быгатӥз. Соин милемлы но лулъёсмес юнматон но та секыт вакытъёсты ортчон понна, Инмарлэсь яратон но оскон куроно.
Туннэ ми адӟиськомы, кызьы быдэс дунне Инмар бордысь па-лэнтӥське, куке оскон начарме но шонер улон сямлэн инъетэз куашка; соос интые сьӧлыкез сӥлы карон юнматӥське. Черк бордысь палэнтэм дунне туннэ возьматыны тырше: христиан зэмлыкъёсты куштыса, культура но узырме, пе, майбыр улон но вуэ, пе. Но история мекетсэ возьматэ: ноку но Инмар бордысь куштӥськон адямилы узырлык ӧз сёт на. Талы пумит Инмар ӵемысь курадӟонъёс пыр адямиез нош ик но нош ик Ас палаз берыктыны тырше.
Туннэ асьме Атыкай музъеммы секыт вакытъёсты чидано луэ. Таӵе дауръёсы асьмелы яратонэн но осконэн, ӵош огазеяськыса курадӟонъёсты ортчыны кулэ. Ӵош вӧсяськомы ӝоже усемъёсты Инмар мед буйгатоз, асьме ожгарчиосмез мед утёз, вынлыко калыкъёслы нош ик эшъяськон мед сётоз но котькыӵе ожгар вачевуонъёс ӝоген мед йылпумъяськозы шуыса.
Сюлмысьтым сӥзисько тӥледлы, Христослэн Вордӥськемез пайдатэм медаз кыль: лулъёсады со уно ӟеч ужъёсын мед сяськаяськоз. Котькудӥз Инмарлы оскись адями туннэ осконзэ нылпиосызлы кельтыны мед сюлмаськоз, соос но азьланяз тазьы ик Вифлеемын вордӥськем Христос Инмарез данъяса, Солэсь яратонзэ но гажан-жалянзэ шедьтыны мед тыршозы.
ВИКТОРИН
ИЖКАР-УДМУРТ ЕПАРХИЫСЬ МИТРОПОЛИТ
Ижкар,
Христослэн Вордсконэз,
2023 ар.