Викторин митрополитлэн Пасхаен ӟечкылан гожтэтэз
Ижкар-Удмурт митрополиаысь ВИКТОРИН митрополитлэн Ижкар-Удмурт епархиаысь священникъёсты,
монахъёсты, мирын улӥсьёсты
ПАСХАЕН ӞЕЧКЫЛАН ГОЖТЭТЭЗ
«Кылчинъёсын ӵош адямиос Тынэсьтыд, Утисе, куиньмойскын улӟыса султэмдэ кырӟаса данъяло, соин уго быдэс дуннелэн вань пумъёсыз югдытскизы»
Пуксён (Вторник) Югыт нуналлэн службаысьтыз стихира
Быдӟым визьлэсь нуналъёссэ ортчыса но ӟеч ужъёсын шумпотонэ пырыны дасяськыса, сюлмысьтымы вазиськомы таӵе кылъёсын, кудъёсыз быронтэм улонлэсь кутсконзэ азьвылто:
Христос улӟыса султӥз!
Кузё-Инмарлэн Пасхаез возьматэ асьмелы со нуналэз, куке Христос-Инмарлэсь зэмлыксэ тодэм вань калыкъёс кулэмысь улӟыса султозы но Инмысь Атайлэн Эксэйлыказ люкет басьтозы.
Зэмос яратонлэн пумыз ӧвӧл. Нош зэмос яратонэз милемлы кортӵогаса вием но кулэмысь улӟыса султэм Христос-Утисьмы возьматӥз. Зэмос яратонлэн сӥяменыз сэрен, Христослэн верамезъя, трос курадӟонъёс музъем вылэ лыктозы. Али асьмеос ваньмы адӟиськомы, кызьы та кылъёс быдэсмыны кутско. Курадӟонъёсы вуыса, асьмелы туннэ огазеяськыны тыршоно. Нош огазеяськонмы соку гинэ азинлыко луыны багатоз, куке асьмеос солы яратонмес инъет каромы — тае асьмелы али юн валаны кулэ. Дуннеын ӧжыт сыӵе кунъёс, кытын валче, одӥг калык музэн, улыны быгато пӧртэм осконысь калыкъёс, нош асьме странамы вапумъёс ӵоже таӵе валче улон доры мынӥз. Туннэ тужгес ик шуг-лек вакытъёсы асьмелы ог-огмес яратыса огазеяськыны тыршоно.
Гажано атайёс, агай-вынъёс, сузэр-апайёс! Мон туннэ тӥледын ӵош шумпотӥсько но тӥледыз Пасха праздникен ӟечкыласько! Кулэмысь Улӟыса султэм Инмармылэсь сӥзисько тӥледлы, нырысь ик, ӟеч но тупаса улон. Котькудӥз Пасхалэсь емышъёссэ бичаны тыршись христиан сюлэм ӟеч ужъёс лэсьтон мылкыдын но яратонэн мед улоз, кызьы талы Иоанн Златоуст югдытӥсь дышетэ: « Яратон со – котькыӵе ӟеч ужлэн выжыез, ошмесэз но анаез. Котькыӵе ӟеч уж – со яратонлэн емышез».
ВИКТОРИН
Удмурт Митрополиялэн кивалтӥсез,
Ижкар-Удмурт Епархиысь митрополит
Христослэн Пасхаез
Ижкар, 2023 ар
