Викторин митрополитлэн Христослэн Вордсконэныз Ӟечкылан гожтэтэз
Викторин митрополитлэн,
Удмурт митрополияысь
Ижкар-Удмурт епархиысь священникъёсты,
монахъёсты, мирын улӥсьёсты Христослэн
Вордсконэныз Ӟечкылан гожтэтэз
Христослэн Вордсконэз дырья пудо возьмасьёс шулдыръясько но кылчинъёсын ӵош данъяло, кизили но кузьым вае, визьмочиос йыбырто, адямиос, утиськон басьтыса, Инмар Анаез данъяло.
30 толсуре службаысь стихира.
Та данлыко нуналэ, куке асьмеос тодамы вайиськомы, кызьы Инмарлэн гажан-жалянэз музъемлы сётэмын вал, вань сюлмысьтым ӟечкыласько тӥледыз Христослэн Вордсконэныз!
Уго асьмелы Нуны вордскиз – асьмелы Пи сётэмын: уго Инмар – милемын!
Арлы быдэ асьмелы луонлык сётӥське утиськонмылэн тайнаез сярысь рос-прос малпаськыны. Мае ми валаськомы Христослэн Вордсконэз сярысь малпаськыса? Валаськом Инмарлэсь яратонзэ, Ас кылдытэм адямиез сярысь сюмаськемзэ, адямиез сьӧлык бордысь мозмытыны тыршемзэ. «Адями Пи но уго Ас вылаз ужатыны ӧз лыкты, Со Ачиз адямиослы ужаны-тыршыны, Аслэсьтыз лулзэ сётыса, троссэ сьӧлыкъёслэсь мозмытыны лыктӥз», — вера асьмелы Ӟеч Ивор (Мк.10:45). Малпаны ик секыт, кызьы Быдӟым, ваньзэ кылдытӥсь Инмар, Аслэсьтыс Инмар луэмзэ куштытэк, Ассэ адями кариз. Озьы ке но, асьмеос Евангелие пыр, черкысь Таинствоос но ӟеч ужъёс пыр со быдӟым паймымон ужез сюлэмъёсынымы адӟыны быгатӥськомы.
Секыт вакытэ асьмелы улыны кемдӥз. Соин ик мынам котькуддылы дэмламе потэ, Кузё-Инмармы сьӧры мылысь-кыдысь вамышъяны, Солэн дышетемезъя ӟеч ужъёс лэсьтыны, яратонэз но гажан-жалянэз та дуннеын вӧлмытыны.
Зэм ик, та нуналъёсы тросэз милесьтым – Инмарлы оскись муртъёслэсь – гажан-жалянмес возьмало. Возьмало гажан-жалянмес ожгарчиос, кинъёс туннэ, улонъёссэс жалятэк, странамес тушмонлэсь утьыны тыршо. Соос тужгес ик атыкай музъемзылэсь шунытсэ, юрттэтсэ но яратонзэ кулэ каро. Возьмало гажан-жалянмес соослэн семьяоссы но, ожмаськонын бырем солдатъёслэн ӵыжы-выжыоссы но. Возьмало гажан-жалянмес сӧсырмем, больницаосын кыллись ожгарчиос. Асьмелэсь ӟеч ужъёсмес возьмало ожмаськон интыосысь пегӟем, юртъеръёстэк кылем адямиос но. Ваньзы соос – асьмелэн матысь муртъёсмы, кинлы Инмармылэн курон-косонэзъя ӟеч карыны тыршоно. Ӟеч ужъёсмы, гажан-жалянмы Вифлеемын вордӥскем Христослы кузьым но луоз, оскномылэсь данзэ но ӝутыны быгатоз. Озьы ми шунды ӝужан палась лыктэм визьмочиослы укшаны быгатомы. Тыршом та нуналэ ӟеч ужъёсын Инмарез данъяны, котьку Быдӟым Василий святительлэсь кылъёссэ тодамы вайыса: «Инмарлы котьткуд адямилэн кузьымез уг кельшы, солэн гине кузьымез кельше, кин сое чылкыт сюлмысьтыз вае».
Та нуналъёсы вӧсяськыса сӥзисько тӥледлы тазалык но юн оскон. Семьяосады каньыллык мед луоз, сюлэмъёсты Инмарлэн дэлетэныз тыр мед луозы. Туннэ вордӥськем Утисьмы тӥледлы Аслэсьтыз гажан-жалянзэ но бакельлыксэ мед сётоз!
ИЖКАР-УДМУРТ ЕПАРХИЫСЬ МИТРОПОЛИТ
Ижкар,
Христослэн Вордсконэз
2024 ар.
