Ижкар-Удмурт митрополиысь Викторин митрополитлэн священникъёсты, монахъёсты, мирын улӥсьёсты Пасхаен ӟечкылан гожтэтэз

Кузё-Инмарен яратэм сӥлы атайёс,
гажано агай-вынъёс, сузэр-апайёс!

Тынад улӟыса султэменыд югдытӥськыса,
Кузё-Инмаре, рай асьмелы выльысь усьтӥське;
котькуд улэп маке Тонэ ушъяса,
данъян гуръёс тыныд вае.

Югыт Пуксён нуналэ ӝыт службаысь стихира
Быдӟым визянлэсь вакытсэ ортчыса, туннэ ӟеч
ужмылэсь емышъёссэ бичаломы.

Ваньмы пумиталомы вань калыкъёслэсь валтӥсь югдурзэ – Иисус Христослэсь кулэмысь улӟыса султэмзэ. Таӵе улон вайись кылъёсын ӟечкылаломы ог огмес:

Христос улӟыса султӥз! Зэм ик улӟыса султӥз!

Христослэн кулэмысь улӟыса султэмез ваньмес кулонлэсь жильыетлэсь мозмытӥз. Туннэ асьмеос Инмысь Атаймылы вазиськомы но Солэн яратонэныз герӟаськыны быгатӥськомы. Та яратон пеймыт шайгуысь пиштыса улэ но вань уродзэ дуннеысь быдтэ. Тазьы со сярысь вера Кипрысь Епифаний святитель: «Туннэ кулоно муртлэн бӧрдон вакытэз йылпумъяськиз но улӟыса султонлэн югытэз пиштыны кутскиз. Со югыт – Инмарлэн быдӟым яратонэзлэн тодметэз луэ. Туннэ Христос адями борды кырмиськем кулонэз быдтӥз».

Оскиськомы, Христослэн улӟыса султэменыз кулонлэн кужымез быриз, шуыса. Озьы ке но, тросэз туннэ кулонэз яке шимес учырез курдаса уло. Пӧртэм кӧшкемыт иворъёс пӧлын улыса, асьме понна но, семьяосмы понна яке атыкай музъеммы сярысь кышканы кутскиськомы. Кузё-Инмармы но Евангелие пыр азьвыл вераз вал: сьӧлыклэн кужымез та дуннеын уг быры, малы ке шуоно, адямилэн урод сямъёсыз котьку но дуннеын вылэ ӝутэмын луэ.

Талэсь бервылзэ адӟиськомы: калыкмы кӧшкемыт учыръёс пыр ортче, со шонерлыксэ но аспöртэмлыксэ ожмаськон бусыын утьыны кулэ кариськемын. Таӵе секыт учырен ваем курадӟонъёс асьме Удмурт шаерамы но вуо, асьме семьяосамы пырисько.
Кызьы Евангелиын верамын, апостолъёс но Дышетӥсьсылэн кртӵогам бераз иудейёслэсь кышкаса улӥзы. Нош Христослэн улӟыса султэмзэ сярысь тодыса, юн сюлмо но кышкасьтэм луизы. Дышетӥсьсылэн кылъёсыз соосты юнматӥз, со уго тазьы шуэм: «Дунне вылын куректон-кайгуды луоз, но юнматске: Мон дуннеез ворми» (Ин. 16:33).

Та осконэн но та кужымен трос вапумъёс ӵоже Черкмы, Христослэсь Кылзэ дунне вылтӥ вӧлмытыса, сылэ. Кӧня ке дауръёс талэсь азьло Инмарлэн Кылыз асьме музъеме но вуиз. Берлогес Ижкар епархимы но кылдытэмын вал, кудӥз туэ кылдытэмезлэсь сю арзэ пусъе ини. Сю ар — со история ласянь вакчи вакыт ке но, туж секыт аръёсын тырмытэмын вал. Калыкмы но, Черкмы но XX-тӥ дауре пӧртэм курадӟытӥсь учыръёс пыр ортчоно луиз. Мон верасько, нырысь ик, Инмарлы осконэн нюръяськон но Быдӟым атыкай ожмаськон сярысь.

Ӵемысь паймиськомы: кызьы атайёсмы сыӵе секыт аръёсты чиданы быгатӥзы? Кытысь кужым басьтӥзы Инмарлы оскон понна яке атыкай музъемзы но калыксы понна улонзэс сётыны? Малпасько, секыт вакытэ соосты юнматӥз оскон. Со ик оскон, кудӥз куке но апостолъёсты юн сюлэмо кариз. Малыке шуоно, оскиськомы ке, Христос улӟыса султэменыз кулонэз быдтӥз шуыса, валаськомы, асьмеос но вуоно дауръёсы Христосэн ӵош пумтэм улонэ пырыны быгатомы шуыса. Таӵе оскон но Инмар вылэ оскиськон асьме атайёсмылэн лул пушказы котьку но улэ вал.
Гажано атайёс, агай-вынъёс, сузэр-апайёс! Та святой нуналъёсы Пасхалы шумпотонлэсь палэнэ ум кариське. Улонмес ӟеч ужъёсын тырмытыны тыршомы. Инмарез данъяса, курадӟись адямиослы кимес сётомы, котькуд урод ужез котырысьтымы улляны турттомы. Котькуд курадӟонэн но кышканэн кынмем сюлэм туннэ Христослэн яратонэныз мед шунатӥськоз.

Одӥг но адями сюлэм Пасхалэн ӟеч люкетэзтэк медаз кыль!

Удмурт Митрополиялэн кивалтӥсез,
Ижкар-Удмурт Епархиысь митрополит
Христослэн Пасхаез Ижкар, 2026 ар
Источник: Официальная группа Ижевской епархии Удмуртской митрополии
https://vk.com/wall-10581054_16249